Asunción, Agencia IP.- Ko árape, 30 de mayo 07:30 guive opa peve, Cooperativa 24 de Octubre Ltda-pe, opytáva 14 de Mayo ha 23 Proyectadas áripe avarekoha Tacumbúpe, ikatu ojejogua hetave 10.000 kílo so’o iporãva ha ivaratovéva ikatu hag̃uaicha og̃uahẽ hetave óga Paraguaýpe ha ambue távape.
Avei, ko árape oiko hína Feria de la Agricultura Familiar bloque Cecoproaan Abasto Norte-pe, opytáva táva Limpio-pe 05:00 aravo guive opa peve. Kóva oipytyvõta mokõi organización ha’éva tetãvore San Pedro ha Central-guáva omotenondéva Dirección de Comercialización ha Extensión Agraria / PIMA, Ministerio de Agricultura y Ganadería-guáva.
Upépe ikatu ojejogua ambue mba’e iporãva ha ivarátova, ha’eháicha kesu Paraguái, kure, kavara ha ovecha ro’o, ryguasu kaséro, ryguasu rupi’a, avatiky, avati ku’i poróto pytã, eirete, manduvi, poróto peky, habilla, poróto manteca, aramirõ, tomáte, lokóte, mandi’o, jety, verdeo, yva’a, rembiapojegua, yvoty, yvyra ha ambue.