Asunción, Agencia IP.- Pytyvõ Pya’erã Sãmbyhyha (SEN) ogueraha 43 tapichakuéra refugio-pe oñangareko hag̃ua hesekuéra ro’y guive, lunes pyhare guive ko martes 28 jasypokõime pyhareve jave.
Ojegueraha kuri albergue-pe SEN rehegua umi tapichakuéra oĩva Paraguaýpe ha ndorekóiva hóga. Upépe, oñeme’ẽ chupekuéra tembi’u hakúva, frasáda, kochõ, ao ro’ysãme g̃uarã ha ambue.
Avei oipytyvõ hikuái 11 tapicha opytasévante, péicha omoañete Pytyvõ Pya’erã Sãmbyhyha (SEN).
Operativo Jaho’i omba’apo ára ha pyhare pe albergue oĩva Costanera Norte-pe, ha avei oreko hikuái mokõi refugio Primera División de Infantería-pe ha Costanera Sur-pe. Ko operativo oñepyrũ 14 de mayo, ro’y oñepyrũgui oñeñandu guive.
Ikatu rehenói 0986 111-001 ha 0985 235-331 emombe’u hag̃ua rehecha ramo umi tapicha ohasa asýva ro’y rehe.