Asunción, Agencia IP.- Ko árape ojejapo hína feria agricultura familiar rehegua vy’a guasu Arareñóire g̃uarã. Ko feria oikóta 07:00 guive 22:00 peve.
Peteĩ grupo omoheñóiva 43 organización productora oime hína ko edición pyahúpe ojeheróva “Fiestas con sabor a Campo-Año Paha”, chákra guive consumidor peve intermediario’ỹme.
Ko feria ojejapo hína Turista Róga Costanera-pe07:00 guive 22:00 peve, he’iháicha Yvy ha Tymba Ñangareko Motenondeha (MAG).
Heta ñemitỹhára oikóva tetãvore Concepción, Ñeembucú, Itapuá, San Pedro, Central, Cordillera, Bajo Chaco, Caaguazú ha Paraguarípe oho hikuái oĩ hag̃ua ko feria-pe. Dirección Extensión Agraria ha Dirección Comercialización rehegua oipytyvõ hína ko’ã ñemitỹhára kuéra.
Umi ohóva ikatu ojogua heta mba’e ipyahúva, iporãva ha hepy’ỹva. Oĩ hína kesu Paraguái, kure, kavara, ovecha, ype ha ryguasu ro’o, avati, sebói, kumanda, ryguasu rupi’a, avati ku’i, eíra, maní ha ambue.
Avei, ojevendéta hína kumanda manteca, peky ha avilla, aramirõ, tomáte, lokóte, áho, mandi’o, jety, sebói rogué, yva’a, gráno, tembi’u ñane retãme rehegua, rembiapojegua, yvoty, yvyra, ha ambue. Ko feria-pe oipytyvõ hína Itaipú Binacional ha Unops Paraguáire.
Yvy ha Tymba Ñangareko Motenondeha (MAG) omboguata hína feria ko’ãichágua, ikatu hag̃uaicha oipytyvõ umi ogayguakuéra oikóva ñane tetã ryepýpe.